~..يوميات عليا...~الجزءالسادس عشر

    شاطر
    avatar
    ★..RORO..★
    عضو متميز
    عضو متميز

    الاوسمة
    عدد المساهمات : 252
    نقاط : 18264
    تاريخ التسجيل : 09/12/2010
    العمر : 24
    الموقع : JusT riGht hEaR

    ~..يوميات عليا...~الجزءالسادس عشر

    مُساهمة من طرف ★..RORO..★ في السبت ديسمبر 25, 2010 5:02 am

    الجزء **16**

    تذكرت عليا السالفه وصدت صوب هزاع وهي مبققه عيونها
    هزاع: عليا شو بلاج ؟؟
    عليا: ما شي وتمت تطالع صبوعها
    هزاع: تبين الطلاق؟؟
    عليا: ......
    هزاع: يعني ما تبين الطلاق صح؟
    عليا: لا
    هزاع: يعني تبين الطلاق؟
    عليا: لا
    هزاع: عيل شو تبين انتي الحين؟؟
    عليا: في خاطري يوم واحد ترمسني بدون ما تزاعج واتفاهم وياك وتفهمني الي يصير واقولك بالي في قلبي وتقولي بالي في قلبك
    هزاع: انزين تعالي نيلس هناك ونتفاهم
    نشت علياوسارت يلست عند هزاع
    هزاع: يلا قولي بالي في قلبج؟
    عليا: ابا اعرف كل شي ليش خذتني وشو صار وشو شعورك وكل شي فهمني قولي بالي في خاطرك والي صار واستوى؟
    هزاع:ااااه شوفي اظني انتي تعرفين ليش خذتج ولا كيف حبيتج هيه بس دوم كان في شي يدور في بالي عيال شقر ما كنت ابا هالشي كنت اموت فيج بس كنت احس ان في شي في قلبي يبعدني عنج والمهم قبل ما اخذج وباليوم الي قبل العرس سرت لميثا وقلتلها اني احبها واني اباها واني بطلقج وباخذها ويوم عرسنا اول شي كنت وايد مستانس ونسيت كل شي بس بعددين بدت الافكار اتي في راسي وبديت اكرهج وبديت ابتعد عنج وطبعن كنت ارمس ميثا عسب انساج وحاولت اني اتقرب منها وابتعد عنج وانتي ساعدتيني بهالشي وعقب في يوم تقربت منج وانتي تقربتي مني وهالشي حسيته وعقب ردينا نتضارب وسافرت ويوم رديت كنت مستانس طاير من الفرحه قالولي انج حامل وبعد كنت متوله عليج ييت وانصدمت من الي سويتي وغيضت وعقب بعد حاولت وحاولت وياج س انتي ما سويتيلي سالفه وهني قررت اني اخطب ميثا وخطبتها وعق صار الي صار
    عليا: وانت الحين شو تحبني ولا لا؟؟ شو انا بالنسبه لك؟؟
    هزاع: احبج وهالشي من زمان وانتي شي ما اقدر اوصفه بالنسه لي وانا ما توقعت اني بحب ولدي كل هالحب والله لو تعرفين بشعوري والي احسه يوم اشوف ويه ويوم اشله شعوري ما ينوصف وانتي يا عليا شو؟ انا شو بالنسبه لج؟؟ شو شعورج صوبي؟؟ واظن انج تكرهيني بعد الي سويته فيج
    عليا: انا حبيتك من اول ما شفتك وصرت شي في حياتي ويوم كنا نتضارب ما تدري شو كان يصير فيني وحتى مره تدري قبل يوم قلت حلات الوحده يوم شعرها اسود وعيونها سوده تعرف شو استوا فيني هني تعرف كيف حطمتني جرحتني يعني انا مب حلوه بالنسبه لك وعقب يوم خطبتني اوووف لو تعرف بالوناسه الي حسيت بها وعق كنت تصدمني بحركاتك بعد العرس ضرتني خنتني وسويت اشيا ما توقعتها منك بديت اكرهك هذاك الوقت بس كنت احبك بعد في نفس الوقت وعقب تميت تجرحني وتجرحني وبعد كنت انسى بس يوم اتصلت بك وردت عليه هدى كرهتك والله كرهتك كره وعقب يوم شفت ويهك حسيت بقهر وعقب يوم كنت برد يوم رضيت عليك بعد الي شفته والي تسويه لي كنت ارتب شنطتي عسب ارد لك جان احصل عويش وسلامه يدشون عليه ويصيحون يوم عرفو شو بسوي وعقب يا عمي وخبرني انك خطبت ميثا لو تعرف بالصدمه الي يتني طعنتي بحركتك صدق صدق لو تعرف بالي حسيته يوم يقولي عمي هزاع خطب ميثا وعقب انت كنت تدافع عنها وتسوي وياها حركات كرهتك احبك بس حركاتك تكرهني فيك تخليني ابتعد عنك
    هزاع: كنتي بتردين لي؟؟
    عليا: هيه
    هزاع: والحين بتردين لي؟؟
    تمت عليا تشوف هزاع: وانت بتاخذ ميثا؟؟
    هزاع: ما بقى عالعرس غير 3 ايام
    عليا: هزاع انا ما اروم ارد لك واعرف انك لوحده غيري وان عندك حرمة ثانيه ما اروم اتقبل هالشي وادخله في مخي ما اروم
    هزاع: يعني ما تردين لي؟؟
    عليا: ما اروم وانت تروم ماتاخذ ميثا؟؟
    هزاع: ما اروم ما اخذها ما يصير
    عليا: وانا ما اروم اردلك وانت بتاخذ ميثا
    هزاع: يعني خلاص هذا الي تبينه يعني ان نتفارق خلاص
    عليا: وهذا الي انت تباه انك تاخذ ميثا ونتفارق
    هزاع: يعني خلاص تبين الطلاق
    عليا: مب هالشي انت السبب فيه مب انت الي وصلتنا للطلاق مب انت فضلت ميثا عليه يعني انت مب انا الي ابا الطلاق
    هزاع: افهميني لو مره في حياتج
    عليا: وانت حس فيني لو مره في حياتك
    هزاع: عليا دخيلج مب مب رايم يفهمج انتي شو تبين الحين تبين الطلاق ولا لا؟؟
    عليا: ما اعرف ما اعرف هيه لا ما ابا اتم عذمتك لو خذت ميثا ما اتحمل ما ابا
    هزاع: اقول وانا مب رايم افكر واركز بعدين بنرمس بعدين ابا اسير ارتاح وافكر انا طالع بسير
    طلع هزاع عن عليا وهو ما يدري شو يسوي ركب سيارته وسار بيته وهو يفكر
    .
    عويش وسلامه كانو يالسين فوق في الصاله
    عويش: تعرفين ان اخوج عجيب
    عقدت سلامه حياتها: شو كيف يعني؟؟
    عويش: اول شي كل شوي وحب وحده تحيدين اصلن هذا مرض في اخوج تحيدين قبل يوم كان في الثانويه كل يوم يحب وحده من الفريج ولا وحده يرمسها عمره ما كمل ويا وحده شهرين والله حاله قلنا بيعرس ويصطلب شفنا لا سار وخذ الثانيه مع انه عنده وحده مالها مثيل ما ادري اخوج شو يبا الحين بياخذ ميثا عقب شهرين بياخذ الثالثه وعقب شهرين بعد الرابعه وعقب يطلق وحده فيهم عسب ياخذ الخامسه وجيه لين ما يموت وهاي بتكون حياة اخوج والحمدالله
    سلامه:هههههههههههههه سخيفه انزين فديته اخوي بس هو ما ادري كيف هالانسان بس تعرفين صدقج هذا ما يعيبه العجب صدق غريب يعني في واحد عنده وحده مثل عليا وياخذ ميثا
    عويش: ترا اقولج لو عنده ملاك بيمل منها استغفر الله مرض مرض شي يمشي في دمه
    سلامه:هههههههه
    وشافت سامه اخوها الصغير سالم
    سلامه: فديـــــــــــــــــت هالويه انا هذا شيخ الرياييل شيخهم تعال حبيبي
    عويش: ووعععععع هذا شيخ الرياييل هذا شيخ الدينصورات التماسيح البارحه عضني السبال والله لو تشوفين ايدي السخيف روح مناك فقدت هالويه
    سلامه: عويش جب ولا تقولين فقدت هالويه سخيفه تعال حبيبي
    عويش: ما عندج سالفه
    .................................................. ..
    ومرن اليومين واليوم عرس هزاع <(0 _0)><(^_^)> وميثا
    ......................
    كانت عليا يالسه في حجرتها ودموعها على خدها من اول ما نشت(( ما طلقني شرد واليوم عرسه يعرس اليوم بياخذ ميثا))
    كانت تلعب ويا ولدها ودموعها عشره عشره انسدحت عند ولدها وتميت تصيح بصوت مسموع من القهر الي فيها وعقب هدت وغسلت ويها وردت عند ولدها
    الساعه 4 دشو سلامه وعويش حجرة عليا ويلسو عندها وهم يدرون انها مب متفيجتلهم وانها وايد متضايجه طلعو من عندها وسارو الصالون
    تمت عليا تصيح وتصيح على حالتها (( منحوسه طول عمري بتم منحوس اونج بتستانسين انتي وين والوناسه وين شوفي ويهج المنحوس قبل مالت عليج وعلى حظج فوقج من يوم يومج وانتي نحسه وحظج طايح تبينه الحين يعتدل والحين يايبه ولد عسب يعيش الي عشتيه لا انشالله كل شي ولا ولدي ولدي لازم يعيش احسن عيشه وشو يعني يتم بدون ابو ترا عنده ام وشله بابوه انا الي بسويله الي يباه وكل شي وولدج شيخ الرياييل كلهم لا تبين لا هزاع ولا غيره يعرس خله يعرس بدال الوحده 10 اقول اسكتي احسن لج انتي يايه تقصين على نفسج مالت عليج حتى ما تعرفين تقنعين نفسج))وتمت تصيح من القهر الي تحس به ما عندها حد تشكيله ولا شي والشي الوحيد الي بترتاح يوم بتسويه هو الصياح عالاقل تخفف من الهم الي في قلبها
    وعالساعه 8 سارو العرس وعليا تشوفهم وهم يركبون السياره وهم يطلعون من البيت سارت ووقفت عند الدريشه وتشوفهم وهم يركبون السياره ويسيرون سارت عليا حجرتها وهي تربع وقفلت الباب ولوت على ولدها وتمت تصيح بصوت عالي تمت تصيح وولدها يصيح وياها سكتت ولدها الي رقد ويلست تمشي في الحجرة وهي تصيح سارت صوب السده وبطلت السده وطلعت صورة هزاع تمت تشوف صورته وتصيح (( خذته مني خذته حسبي الله عليها قطعت قلبي فرقت بيني انا وريلي فرقت بينا وبعدت ولدي عن ابوه يارب بموت من القهر بموت من العذاب ابا هزاع ابا ريلي لالالا حرام عليهم ابويه وانحرمت منه واميه بعد والحين ريلي من بقى لي اغلى ناسي مب عندي فديت ولدي الله لا يبعدني عنه فديته وسارت صوبه وتمت تشوفه والله العظيم انا متحمله كل شي عشانك متحمله حياتي عشانك غناتي ولدي فديتك وفديت ويهك محلاه تشبه ابوك وايد تشبه زين يوم ما شبهتني ولا جان عشت الي عشته زين يوم شعرك مب اشقر وعيونك مب ملونه الحمدالله انك ما تشبهني الحمدالله لك يا رب ))
    انسدحت عليا عالشبريه وهي كل شوي وتشوف الساعه(( اكيد الحين هم مستانسين مرتبشين ومن قدهم))
    ... ومرت الدقايق.. والساعات..بين...ايتسامة هزاع..ودمعة عليا...يولة عبدالله ...طيحة عليا...ضحكة ميثا... وشهقة عليا... فرح هزاع...حزن عليا...دموع فرح.. ودموع حزن... ربشه وفرحة.. الم وقهر... جمع قلبين.. وتفريق قلبين... سعادة ناس.. وعذاب ناس... سعادة قلب... وتحطيم قلب.. ونات فرح.. ونات حزن...
    ......................
    عالساعه 12 خلص العرس وسارو المعاريس بيت بو فهد عسب يساعدون البنات ميثا في انها تعق الفستان وعقب يسيرون بيت هزاع باجر يسافرون
    ... سمعت عليا حشرة في الصاله وعرفت انهم ردو فجت الباب شوي شوي وشافت **هزاع وميثا** وهني يتها الصدمه(( مب كفايه انه ما خذنها وعذبني ويايبنها هني يايين هني وين انا اكون شافتهم وحست بشي ما ينوصف طاحت عليا عالارض اغمى عليها من الي شافته ريلها حبيبها ويا حرمته الثانيه ما اتحملت ما قدرت تتحمل اكثر الي في قلبها ما قدرت تتحمل الي يصير الها
    ^^^
    من البارحه يا ناس عايش في غيبوبة... من صدمتي ذا اليوم مب قادر اتكلم
    صدق الخبر لي شاع والكل سمعو به... وانا الين الحين كاني قاعد احلم
    ^^^
    سارت ميثا وعويش وسلامه وراها ووديمه وحصه اختها يساعدونها في انها تعق الفستان
    كانو كلهم يالسين في الصاله جان يسمعون "احمد يصيح" وما سكت احمد وتم يصيح نشت ام فهد تشوف شو بلاه وكلهم يتحرون ان عليا عنده اول ما بطلت ام فهد الباب شافت عليا طايحه
    ام فهد: علــــــــــيـــــــــــــــا !!! الحقوو عليا
    من سمعو ام فهد تزاعج سارو كلهم يربعون وشافو عليا طايحه يابو لها ماي وحطو غرشو العطر تحت خشمها كانت تفتح عيونها وترد تسكره ام فهد شاله احمد وتسكته
    هزاع: ابوي بشلها بوديها المستشفى يلا نوديها
    شلها هزاع ولبسو عليا عباتها والشيله
    ام فهد: هزاع انت لا تسير وحرمتك انت معرس هزاع
    ما سوالها هزاع سالفه حرمته بين ايده تموت ويسير عند ميثا
    شلو عليا وودوها المستشفى
    اما عن البنات فطلعو وعوفو السالفه وميثا من عرفت ان هزا سار تمت تصيح
    في الستشفى
    طلع الدكتور وقالهم ان عليا ياها انهيار عصبي
    بو فهد: هزاع ابويه رد انت البيت وانا بتم عند عليا سير انت توك معرس واليوم ليلتك الاولى سير ابويه
    هزاع: ما بسير انا الا وعليا وياي ولا تحاولون
    وكانت ام فهد تتصل في هزاع وما يرد عليها وتتصل في بوفهد عسب يقول لولده ان يرد لان ميثا ميته من الصياح وهزاع مسولهم طاف
    وتم بو فهد يرمس ولد
    هزاع: ابويه انتو يوم تسوون جيه وتقولولي جيه انا اعاند جيه خلاص والله اني ما رد البيت خلاص قلتلكم ما برد يعني ما برد وحرمتي ما بطير تراها موجوده
    دش هزاع عند عليا وشافها كانت راقده عالشبريه وتصيح بس بدون صوت
    سار هزاع ويلس عندها وزخ ايديها
    شافته عليا وسحبت ايديها
    ابتسم هزاع
    عليا: طلعوني من هني ابا اسير عند ولدي طلعوني
    هزاع: لا مب اليوم بــ
    عليا: قلتلكم طلعوني ابا ارد البيت
    دش بو فهد وحاولو ويا عليا بس ما طاعت اتم في المستشفى دقيقه تبا تسير البيت عند ولدها
    ردت عليا البيت وكانت ما تروم تمشي تحس ان الدنيا تدور بها ما تروم اول ما يت بتنزل من السياره طاحت سارو هزاع وبوفهد يربعون صوبها
    هزاع: قلتلج لا تطلعين من المستشفى
    عليا: دخلوني البيت عند ولدي ايي ما اروم انش وكانت طايحه ومتسانده على هزاع شلها هزاع ودخلو البيت وسار وحطها عالشبريه
    عليا: اطلع اطلعو كلكم ما اباكم اطلعو
    طلعو كلهم وهم يدرون انها تعبانه ومب متفيجتلهم
    يلس هزاع في الصاله وهو متضايج
    يت ام فهد: يا اميه سير عند حرمتك ليش يالس هني
    تنرفز هزاع وكان بيقطع بشعر راسه من القهر يحس انه مهموم ومحد يالس يفكر فيه وكل شوي قالوله ميثا وحتى محد يفكر في عليا
    نش هزاع ورفس الطاولة الي جدامه وطاحت الطاولة
    ام فهد: وين ساير
    طلع هزاع وما رد على امه ركب سيارته وسار صوب البحر ويلس في سيارته يشوف البحر
    يلس يفكر وعقب رد البيت لان تم يفكر في ميثا شو ذنبها هي رد البيت ويوم دخل سمع ولده يصيح وعليا تسكته ومحد كان في الصاله سار صوب حجرة علياوبطل الباب وشافته عليا
    هزاع: لا تخافين بس ابا اشوف ولدي وشافها يالسه عالشبريه وشكلها تعبانه من الخاطر
    سار هزاع عند ولده وشله وتم يحبه ولعب وياه شوي وعقب رد ولده لعليا وطلع
    وبالباجر
    الساعه 12 كانو كلهم يالسين في الصاله ما عدا عليا وهزاع وميثا وام عبدالله وكلهم موجودين لان هزاع وميثا بيطلعون من البيت الساعه 3 وشوي لان طيارتهم بطير الساعه 5 ونص 6
    الساعه 1 نزلو هزاع وميثا ويلسو وياهم في الصاله وعقب عالغدا سارو يزقرون عليا بس هي ما يت سار عويش عند عليا وشافت ويها الي كامن الحزن يغطي ملامحه والتعب شكلها كانت تعبانه
    عويش: ليش ما بتتغدين شوفي شكلج مب زين تغدي
    عليا: عويش دخيلج لا تحشريني وطلعي لاني صدق تعبانه وما فيه لحشرتج
    عويش: اااه كيفج وسارت
    وعالغدا
    بوفهد: وين عليا وهنيه سكتو كلهم
    عويش: ما تبا تتغدى غيض بو فهد ونش وسار صوبه والكل يطالعه دخل بو فهد على عليا
    بوفهد: ليش ما تتغدين؟؟
    عليا:مــ ماابا مب يوعانه كانت عليا تشوف عمها وهي خايفه اول مره يرمسها جيه
    بوفهد: عليا سمهعي الرمسه الي بقولها اذا هزاع عرس هذا مب يعني انج تعيشين جيه لا ترا الدنيا بعدها ما خلصت وعيشي ايامج بسج من الصياح والحزن يعني لي متى بتمين جيه نشي غسلي ويهج وتعالي تغدي ويانا وما عليج من حد وسوي الي تبينه ويولي هزاع وغيره
    عليا: لا عمي ما ابا اتغدى ما ابا
    حرك بو فهد راسه وطلع
    عليا(( حتى انت يا عمي ما تحس فيه ليش محد يحس بشعوري ليش محد يحس فيه ابا حد بس يعرف الي فيه وكل واحد وقالي عيشي حياتج وهزاع يولي ومن هالرمسه السخيفه وهذا نصيبج وابوج مات الله يرحمه شي انتهى وصار وخلص وامج ودرت وخلاص انزين انا اباهم مب شي عادي يقولون بس ما ت ولا يعرفون معنى هالكلمة مات يعني راح ودرتني وهي الحين مب عندي انا احتاجهم اباهم هي امي وهذا ابوي ما يعرفون شو يعني امي وابوي اغلى الناس عندي حتى ما شفتهم يتحرون هالشي عادي وبتعود عليه محد يتعود عالحزن والالم لين ما اموت انا بصيح على امي وابوي انا اتربين بعيد عن امي وابوي ومب هم الي روني ويقولون لي شو فيها فيها اشيا امي هاي وابويه محد يحس محد والحين ريلي ريلي يعرس عليه ويقولون لي الدنيا ما خلصت الدنيا ما خلصت وحتى حزني ما خلص كيف انسى شو هالخرابيط انسى اعز الناس لي امي وابوي وريلي حد ينسى هالاشخاص اقرب الناس لي ويقولون عيشي حياتج أي حياة اعيشها ليش يتحروني بتحمل اكثر يقولون مات ودرتج عرس يتحرون هالكلام مجرد حروف تنقال شوفوها معناها قبل مات ودرتج عرس عليج لو حد غيري صار في الي يصير لي جان ما عاش دقيقتين اكثر جان يتاه الجلطه ومات من الهم وولدي الي بيعيش بعيد عن ابوه وولدي الي ما ادري مب بعدي كيف بيكون كيف بيكون مستقبله كيف بتكون حياته ))
    يلست عليا تلاعب ولدها
    وبعد ساعه سمعت عليا حد يدق الباب ودخل
    شافت عليا هزاع متلبس وداش
    هزاع: اممم انا الحين بسافر ابا ايلس ويا ولدي شوي
    تمت عليا تطالعه دخل هزاع وسار انسدح عند ولده وتم يلعب ويا ويضحك كانت عليا ترتب اشيا ولدها بعيد عن هزاع وولدها
    صاح احمد وحاول هزاع يسكته بس ما قدر يت عليا وشلة ولدها وتمت تسكته
    هزاع: شو بلاه؟؟
    عليا:......
    رفع هزاع وحده من حياته وتم يطالعها
    دشت عويش الحجرة
    عويش: هزاع فهد يقولك يلا بتتاخر
    هزاع: انزين
    سار صوب عليا وتم يحب ولده وطلع وعليا تشوفه سارت عليا ووقفت عند الباب تشوفه يروح وميثا وياه شافها هزاع وابتسم لها وهي لا ابتسمت ولاشي وسارو ردت عليا حجرتها
    .
    .
    بعد شهر
    .
    في هالشهر كان هزاع ويا ميثا شهر العسل وعليا مسافر هزاع كانت حالته حاله بس عقب بدت تتعود عالوضع وبدا ولدها يكبر ونست هزاع وكل شي واستوت احسن عن قبل وهدت اما سلامه فانخطبت والي خطبها سعيد ولد خالتها ووافقت سلامه والكل استانس لها وقررو ملجتهم تكون بعد شهر من رجوع ميثا وهزاع ورجعو ميثا وهزاع
    .
    يوم الثلاثا الساعه 2وصلو ميثا وهزاع بيت بوفهد وكانو توهم يايين من المطار على طول بيت بوفهد وكانو يبون يسوون سبرايس ((اونهم))
    .
    كانو سلامه وعويش يالسين واحمد ولد عليا في شبريته الصغيره وساره عداله وعليا كانت متسبحه ويالسه تسحي شعرها في حجرتها
    دشو هزاع وميثا وانصدمو الي كانو في الصاله وسارو يربعون صوب اخوهم وسلمو على اخوهم وميثا ونزلو ام فهد وبوفهد يسلمون على ولدهم وحرمته وعقب سار هزاع يربع صوب ولده الي كبر وتغير وايد عن اخر مره شافها فيها هزاع كان متنان وتوه بدا يكبر شل هزاع ولده وتم يحبه ومستانس عليه وكان يحس انه وايد متوله عليه وميت فيه طلعت عليا من حجرتها وشافتهم وقف قلبها كان تشوف ولدها الي هزاع كان شالنه وميثا يالسه عدال هزاع ماتت من القهر وكان ودها تشل ولدها بس ما تقدر تطلع ما تروم بس يو شافت ميثا تلاعب ولدها ماتت من القهر طلعت عليا من حجرتها وسلمت سارت صوب هزاع ومدت ايدها كانها تقوله عطني ولدي
    هزاع: لا خليه متوله عليه
    عليا: ابا ارضعه
    عطا هزاع عليا احمد وتم يشوفها شلت عليا ولدها ودشت حجرتها
    وتمو يرمسون وهزاع يفكر في عليا وحركتها وكان وده يسير الحجره عندها واول ماشاف ميثا سارت ويا سلامه فوق على طول سار صوب حجرة عليا ودش انصدمت عليا يوم شافته
    هزاع: رقد؟؟
    هزت عليا راسها ((لا))
    سار هزاع صوبه
    هزاع: حبيبي وتم يحب ويحبه وعليا تشوفه
    صد هزاع صوب عليا: شحالج ؟؟
    استغربت عليا من سؤاله ((تو الناس)): بخير امممم هزاع بغيت بس اذكرك بشي ققرنا انا وانت اذا خذت ميثا تطلقني وانت من يومها ماييت ولا طلقتني
    هزاع: اها
    عليا: شو اها طلقني
    هزاع: سوري
    عليا: هزاع
    هزاع: هلا
    عليا: اوووووه لا تسخف عليه طلقني طلقني
    هزاع: لا تحاولين لالالا
    عليا: شو كيفك طلقني ما اباك يا ريال افهم ما احبك اكرهك طلقني طلقني
    هزاع: ما ابا ما بطلقج
    عليا: لا والله عيل شو تبا تسوي فيني واظني بيتك حرمتك بتسكن فيه انا وين بتحطني في حجرة الدريوليه
    هزاع: في البيت
    عليا: مستحيل طلقني يا هزاع وريحني منك
    هزاع: اسمحيلي بسويلج الي تبينه بس طلاق هب مطلقنج واحين يعني حبيت اخبرج يعني بعد كم من يوم بي اخذج لاني ما اروم اعيش بعيد عن ولدي وطلع
    ماتت عليا من القهر
    .
    بعد اسبوعين
    .
    كانو سلامه وعويش يالسين في الصاله ويت عليا يلست وياهم وانسدحت عالكرسي
    عويش: شو بلاج؟؟
    عليا: ذبحني احمد كسر لي ظهري
    عويش:ههههههه فديته حمودي
    سلامه: وينه هو الحين راقد؟؟
    عليا: هيه اوف احس بتعب فظيع وهيه هالاسبوع سلامه بنسير الصالون
    سلامه: اسكتي لا تذكريني روحي ميته من الزياغ
    عليا: هههههه يوم الاربعا بتملجون وبيسافر سعيد وعقب يوم بيرجع بتعرسون صح؟؟
    سلامه: هيه وسعيد بيسافر شهرين وبيرد
    عليا: هيه
    عويش: عليا تعرفين انج تغيرتي وكبرتي
    شهقت عليا: ليش ليكون شكلي كبيره وجني شي وثلاثين وانا حليلي 19 الحين
    عويش: حليلج انتي صغيره
    عليا: هيه حليلي
    سلامه:ههه
    وسمعو احمد يصيح
    عليا: ااااااااخ ياربي تعبت ااااااااااااااااااااااااااااااااااه وسارت
    وعويش وسلامه يشوفونها ويضحكون عليها
    .
    وقبل العرس ب3 ايام كانو سلامه وعليا توهم رادين من الصالون ويوم دخلو حصلو هزاع وميثا وشافت عليا ميثا شاله ولدها كانت بتذبحها (( ولدي انا !!! ميثا شالتنه))
    سارت عليا صوب ميثا وشلت ولدها: ياويلج ان قربتي صوب ولدي مره ثانيه
    انصدمو كلهم وتمو يشوفونها وسارت عليا
    وعقب بعد ما رقدت ولدها طلعت ويلست في الصاله وكلهم كانو يالسين
    ام فهد: وين احمد؟؟
    عليا: راقد
    عويش: كم شهر هو الحين الحين؟؟
    عليا: بعد يومين بيكمل الشهرين وبيصير ثلاث شهور
    عويش: فديييييييييييييييييييته
    سمعت عليا احمد يصيح تنهدت عليا: عموه احمد من فتره يرقد دقيقتين وينش يصيح ليش؟؟ شو اسوي به؟؟
    ام فهد: انتي 24 ساعه تبين ترقدينه خلي يلعب ويتعب ويرقد
    نشت عليا وسارت صوب ولدها وطلعته ويلست في الصاله
    هزاع: هاتي ولدي
    سارت عليا وعطت هزاع احمد وهي ودها تصفعه
    تم هزاع يلاعب ولده
    هزاع: قول بابا بابا
    عويش: قول ماما
    هزاع:لالالا قول بابا
    ام فهد: ويه بعده على ماما وبابا توه فديته
    كانت ميثا تكره احمد وتكره حب هزاع له واهتمامه فيه ويوم كانو في شهر العسل 24 ساعه يطريه وهي عاد اونها تحبه وتتفداه لانها تعرف ان يحب ولده وكل ماشاف محل لليهال دش وشرى لولده شي
    ضحك احمد وطار هزاع من الفرحة اول مره يسمع ولده يضحك صوت
    هزاع وهو طاير من الفرحه: فدييييييييييييت هالضحه وفديت هالويه حبيبي انته وتم لاوي عليه واحمد يضحك مستانس وهزاع مستانس اكثر عن ولده لانه يالس يضحكله
    وعليا مستانسه وهي تسمعولدها يضحك وتشوفه كيف يحب ابوه
    عويش وهي ترمس سلامه: شوفي شوفي عليا وهزاع كيف طايرين من الفرحه بس لان احمد ضحك
    ابتسمت سلامه وهي تشوفهم
    عويش: بسم الله بطيرون بطيرون من الفرحه شوفي كيف طارين حلجهم جنه اول مره يضحك
    هزاع: جب انتي اول مره اسمع ولدي يضحك بصوت
    وكلهم تمو يشوفون هزاع الي كان مستانس على ولده ويلعب وياه
    .
    ملجة سلامه وسعيد((يوم الاربعا))
    ...
    الكل مرتبش والكل واعي من وقت وسلامة ميته من الزياغ ويالسه عند عليا وعليا كانت ترمسها وتقولها شو تسوي وعويش اونها تعلم سلامه كيف تمشي
    وعالساعه 2 سارت سلامه الفندق وعليا وياها وما طاعت تسير ويا حد ثاني واحمد تم عند ام فهد
    وعويش سارت ويا عليا وسلامه الفندق
    سار هزاع بيت ابوه اونه عس ييلس ويا اخته شوي ويوم سار قالوله انها سارت الفندق تتعدل وعليا وعويش وسار ويلس عند امه وابوه وولده
    هزاع: ليش سايره من وقت ؟؟
    ام فهد: شو من وقت روحهم متاخرين لين ما يسون شعرها وحركاتهم والي بيحطونه في ويها يباله وقت
    هزاع: منو بيتم عند ولدي
    ام فهد: انا بتم عنده الحين وعقب البشكاره يوم بنسير العرس وعقب عليا بترد من وقت بس بتحضر الملجه عشان خاطر سلامه وعشان تستانس شوي
    هزاع: هيه
    ام فهد: وين ميثا
    هزاع: سارت عند خواتها وعقب يبون يسيرون الصالون
    اتصل هزاع في سلامه وتم يرمسها
    .....
    عليا: عويش وين فستاني؟؟
    عويش: ما ادري هني هناك
    عليا: وين هناك هني
    عويش: هني في الحجرة وين بعد دوري عليه
    عليا: عنبو حتى الفستان يضيع
    وعقب لقته طايح ورا الجياسه
    عليا: حسبي الله عليج يا عويش شوفي كيف عاقه فستاني شلت عليا فستانها
    عويش: لا حول
    ....
    وعقب الساعه 6 ونص خلصو البنات
    والحين كانو بيلبسون سلامه الذهب تمو يدورون عليه وما حصلو
    عليا: عويش انتي ما يبتيه
    عويش: ليش انتي ما يبتيه
    عليا: انا قلتلج ييبه
    عويش: اويه نسينا الذهب
    عليا: هاتي موبايلي بنصل البيت بخليهم اييبونه بسرعه
    اتصلت عليا في ام فهد وخبرتها وقالت لهم ام فهد انها بطرش الطقم الحين
    عليا: الحين بييبونه انزين ايه كيف شكلي
    سلامه: تجننين حـــــــــــلــــــــــــــــوه
    عويش: تفاحه يو يو يويايوتفاحه يا بوخدود تفاحه
    عليا: شكرن شكرن
    سلامه: انزين صدق انا كيف شكلي خسفه صح؟؟
    عليا: ياربي والله العظيم حلوه
    وعقب شوي اتصل هزاع في سلامه وخبرته سلامه وين هي ويا هزاع واول ما دخل انصدم اول شي شاف عليا الي كانت روعه تجنن حلوه بكل معنى الكلمة وكانت لابسه فستان احمر وذهبي وعقب شاف اخته سلامه الي كانت لابسه فستان اخضر حلو ووايد حلو وعقب عويش الي كانت لابسه برتقالي
    هزاع: ماشاالله تفاحه وبرتقاله كلهم هني
    عويش: هيه شو تحرا سلة فواكه نحن
    هزاع: هيه
    وحط هزاع طقم سلامه ويلس عدالها وتم يرمس ويضحك بس عيونه ما فارقت عليا كان يشوفها وجنه اول مره يشوفها كانت غير غير حلوه ووايد حلوه وتم هزاع عندهم وعقب سار وصورة عليا ما فارقت باله
    سار بيته يتعدل وعقب يت ميثا البيت وتلبست ويوم شافها هزاع كان يقارن بينها وبين عليا الصراحه ميثا ولا شي عند عليا بس بعد كانت حلوه وكانت لابسه فستان بني وهزاع ما قدر ما يقارن ين عليا وميثا عليا احلى واكشخ عن ميثا وفستانها احلى وشعرها وشكلها وكل شي فيها احلى بس ميثا كانت حلوه ووايد حلوه بس هزاع شاف عليا اكيد بتكون ميثا ولا شي ترا في فرق بين القمر والنجوم
    .....
    وبدت الملجة وبدت الربشه والكل مستانس وعالساعه 10 ونص دخلت العروس وكانت حلوه ملاك بفستانها الاخضر كانت تمشي وابتسامتها ما فارقت ويها
    وعالساعه 11 ونص كانت عليا بترد البيت لان ولدها مريض مزجم وكانت خايفه عليه وما كانت مرتاحه سارت عند ام فهد وقالت لها انها بترد وسارت عليا ويا الدريول وردت البيت
    ... اما الرياييل فكانو مرتبشين وحالتهم حاله الا هزاع الي كان مزجم وولده السبب لان كان يلعب وياه اليوم ووايد تقرب منه وهو مريض كان يحس بتعب جان يقوله ابوه رد البيت اتصل هزاع في امه
    امفهد: الو
    هزاع: الو اميه شحالج؟
    ام فهد: بخير الحمدالله
    هزاع: ها شو مستانسين؟؟ وسلامه كيف؟؟
    ام فهد: كلنا مستانسين والحمدالله وكل شي حلو عندنا
    هزاع: هيه انزين اميه وين ميثا
    ام فهد: ما ادري بها ليش اميه؟؟
    هزاع: ابا مفتاح البيت تعبان مزجم
    ام فهد: ويه فديتك اميه سير البيت عليا توها راده البيت عند احمد سير بعد بتعطيك دوا سير اميه
    هزاع وهو يفكر: انشالله بسير البيت انا يالله اميه فمانالله
    ام فهد: الله وياك
    سكر هزاع عن امه وسار بيت ابوه على طول دخل هزاع البيت وحصل عليا بعباتها بعدها وشاله احمد الي كان يصيح وهي تحط الدوا في حلجه
    رفعت عليا راسها وشافت هزاع!!!!!
    هزاع: السلام عليكم
    عليا: وعليكم السلام والرحمه
    هزاع: شو بلاه ليش يصيح
    عليا: مب طايع يشرب الدوا وانا يالسه اشرب غصب
    هزاع: هيه وانسدح عالكرسي
    عقدت عليا حياتها: ليش ياي؟؟شو بلاك؟؟
    هزاع: تعبان احس اني بزجم وانا اليوم واعي الساعه 5 الفير
    عليا: هيه فيك حراره؟؟
    هزاع: ما ادري جنه هيه يمكن
    عليا: لحظه بشرب احمد الدوا وبيبلك انت دوا
    شربت عليا احمد دواه وتم يصيح شوي عقب سكت
    هزاع: ها تيه
    عطت عليا احمد لهزاع وسارت اتيبله دوا ويت وشلة ولدها وعطت هزاع دواه
    عليا: سير ارقد في حجرتك
    هزاع: لا
    وتمت ترقد عليا احمد رقد احمد وسارت وحطته في شبريته وردت الصاله تشوف هزاع ولقته راقد حطته عليا ايديها عراسه جان يبطل هزاع عيونه وفزت عليا
    ابتسم هزاع يوم شافها خافت
    عليا: بسم الله زيغتني كنت راقد شو وعاك
    هزاع: لا بعدني هب راقد
    يلست عليا عالكرسي وظهرها متكسر ويعورها وهي بعدها م عاقه لا فستانها ولا شي حتى نعالها عدها لابستنه
    هزاع: شو ناويه تردين العرس.؟
    عليا: لا
    هزاع: عيل اشوفج بعدج بفستانج ونعالج وعباتج
    عليا: لا بس من ييت على طول شليت احمد لانه كان يصيح وتوهني مرقدتنه ما لحقت وبعد ماابا اخرب كشختي
    رفع هزاع حياته: يعني بتمين جيه لين باجر
    عليا: مب باجر لين بعدين
    هز هزاع راسه وهو يضحك(( شو هالمخ شوهالتفكير))
    هزاع: كيف كانت سلامه وكيف الجو عندكم كان
    عليا: والله سلامه كانت ملاك الصراحه والجو عجيب ربشه وكنا مرتبشين بس ما قدرت ارتبش واستانس وياهم
    هزاع: ليش؟؟
    عليا: ما ادري جيه يالسه احاتي احمد كنت ادري انه مريض وجيه ما يهون عليه اخليه في البيت بروحه
    ابتسم هزاع(( لا اليوم يالسه وتسولف وياي مزاجها اوكيه ))
    عقت عليا نعالها
    هزاع: ها ليش خربتي كشختج
    عليا: لا بس بعق النعال
    وشلت عليا موبايلها وتمت تصور عيونها وتصور نفسها وهزاع يشوفها ويضحك ويشوف حركاتها
    هزاع: امحق
    عليا:شو كيفي
    هزاع: ههههههه اونج عاد ما تعرفين انهم يصورونج هههههههههههههههههههه
    عليا: بس عاد خلني اصور نفسي
    هزاع: طاع ظفورها صابغتنهم طاع اللون
    عليا: شو هيه اطقم ويا ملابسي وحلو لونه احمر فاقع
    هزاع: ههه
    ورقد هزاع وهو يشوف عليا وعقب الساعه 2 يو البيت الكل وهم مستانسين وميثا كانت وياهم دخلو البيت وما لقو حد طلعت لهم عليا من الحجرة
    بوفهد: الله الله شو هالزين
    عويش: انتي بعدج بفستانج ههههههههههههههههه
    عليا: هيه ما ابا اخرب كشختي هههههههههههههههههههههههه
    ام فهد: وين هزاع؟؟
    عليا: راقد في حجرته
    ام فهد: رقد!! وعطيتيه دوا؟
    عليا: هيه عطيته وبعد الدوا يرقد
    ام فهد: هيه
    وسارت عليا عند سلامه وسارو حجرة سلامه وتمو يرمسون وميثا كانت يالسه وياهم بس لا هي ترمس عليا ولا عليا ترمسها
    كانت ميثا مقهوره من هزاع ياي هني عند عليا وهي متعدله بعد بعدها هب عاقه فستانها وكانت حلوه ولا بعد يبا يرقد هني
    سمعو هزاع يزقر عليا ماتت ميثا من القهر ونشت بتطلع صوبه نشت عليا
    عليا: احيده يعني قال عليا مب ميثا وسارت عليا وميثا وراها ما كان هزاع يدري ان ميثا موجوده وانصدم يوم شافها
    عليا: هلا
    هزاع: ويه انتو رديتوا؟؟؟!!!؟
    ميثا: هيه
    عليا: شو هزاع شو كنت تبا
    هزاع: لا خلاص ميثا يلا نرد البيت
    هني حست عليا بشعور مب حلو بالقهر ليته يقول عليا ااااااااه وسارت عليا ونزلت تحت سارت حجرتها وقت كل شي من القهر وسارت تسبحت وطلعت ورقدت
    .
    رد هزاع البيت وهو يفكر وبدا يقارن بين عليا وميثا حس انه متوله على عليا في خاطره يكون عند عليا وولده ويتم عندهم بس تعب من حياته وتعب من ميثا يبا عليا يبا يرد الها بس شو يسوي الحين
    .
    وردو الناس شرت ماكانو ردو لحياتهم العاديه مدارس وشغل
    .
    في يوم الجمعه الساعه 8 كانو هزاع وميثا بيسيرون بيت بوفهد لان رمضان بدا
    .
    ركو السياره وهم في الدرب شافو الناس متيمعين وحاله
    ميثا: شو مستوي هني حادث!!
    هزاع: جنه حادث شوفي كيف الناس ملتمين
    ميثا: يالله انشالله محد تعور
    هزاع: انشالله وسارو
    .....
    اما عليا بعد الفطور سارت ويا الدريول الجمعيه تبا تتشرا اشيا وسارت قبل لا ينش ولدها وهم في الدرب وهم رادين من الجمعيه كان الدريول يعدل الجياس عسب لا تطيح وتيطيح الي في الجيس وتجاوز الاشاره الحمرا ويوم انتبه حاول يلف ويت شاحنه ودعمو الشاحنه ونقز الدريول من السياره اما عليا فكانت في السياره وبدت السياره تتجلب وقفت عند اخر الشارع
    ...
    كانوفي بوفهد كلهم يالسين ومستانسين
    جان يرن تلفون البيت
    رد فهد عالتلفون وكانت الشرطه متصله تخبرهم بان عليا والدريول سوو حادث وهم في المستشفى والشرطه خذت الرقم من الدريول الي ما تعور وايد بس شوية كسور وجيه لانه نقز من السياره
    كانو كلهم يشوفون فهد ويوم سكر
    بوفهد: شو شو مستوي؟؟
    فهد وهو يشوفهم: الدريول مسوي حادث وعليا كانت ويا في السياره وهم الحين في المستشفى
    نش هزاع:شووووووووووووووووو
    سارو المستشفى وفي المستشفى شافو الشرطه وحاله وسار هزاع يدور على حرمته وعقب ودوه وين ما كانو حاطين عليا دش هزاع عندها وكانت عليا تصيح وجسمها غرقان بالدم سار هزاع يرع صوهم ودموعه عخده
    هزاع: عليا
    شافت عليا هزاع: هزاع ولدي ولدي احمد
    هزاع: عليا شو احمد
    عليا: دخيلك قول لاحمد اذا استوى فيني شي اني احبه دخيلك سوله الي يباه ولدي لا تخلونه ولدي امانه عندكم
    هزاع: عليا لا تقولين جيه انتي ما فيج شي بس شوي جروح وبيخيطونه وبس هني شوي وهناك
    عليا: انشالله هزاع احبك والله العظيم وايد احبك وطول عمري بحبك من شفتك وانا احبك وولدي يا هزاع احمد
    هزاع: انا بعد اموت فيج من شفتج وانا ميت فيج وانت توصيني على ولدي ويلا عاد انتي ما بلاج شي
    عليا: هيه بس بيخيطولي هني وهني وبطلع بس اذا صار لي شي وحبكم كلكم كلكم وهزاع ميثا استسمح منها يمكن انا ما اقدر دخيلك وخالتك وكلهم خلهم يسامحوني احبكم والله العظيم وزخت ايد هزاع بس يا هزاع احمد قوله ان امك وايد تحبك امك تموت فيك ولا تزعلون ولدي واحمد يحب يتسبح سبحوه كل يوم وسووله الي يباه ولا تخلون شي في خاطره ولا تنسى تعلمه يقول ماما
    هزاع: انشالله انشالله بس انتي الي بتعلمينه وتقوليله انج تحبينه وتستسمحين من الناس ويلا عاد عن الدلع انتي ما فيج شي يو فهد وبوفهد وهادف عند عليا وشافتهم وابتسمت لهم وعقب بدت تتنافض عليا بدت عليا تتنافض في ايد هزاع يو الدكاتره وشلو عليا وتم هزاع يصيح ويدعي ربه وعقب يا الدكتور وقالهم ان عليا ماتت طاح هزاع عالارض وهو يصيح
    هزاعلالا عليا ماماتت لالالالالالالا جذاب عليا ما ماتت حياتي غناتي ماماتت عليا وتم يصيح جنه ياهل وماتت امه وسار يربع في المستشفى جنه مينون والكل يشوفه وهو مستغرب
    هزاع(( الحادث الي شفته يعني انا مريت من عند عليا وما ساعدتها لالالا عيلا ماتت لالالالا حرمتي عليا خلاص راحت مابا اشوفها بعد اليوم راحت غناتي الحلوه بنت الانجليز))
    وعقب عرف الكل بخبر موت عليا
    .
    .
    .
    وبعد سنه تزوجت سلامه سعيد وسافرو وتغيرت وايد اشيا في هالسنه
    .
    .
    .
    .
    وفي يوم
    كان هزاع يالس عند ولده احمد وميثا عدالهم
    احمد: ماما
    صد هزاع صوب ولده
    هزاع: شو شو قلت
    احمد وهو مستانس: ماما
    نشت ميثا صوب احمد
    ميثا: قال ماما قال ماما
    هزاع: عليا ولدج قال ماما احمد قال ماما يا عليا ولوى هزاع على ولده وهو مستانس فديتك يا ابوي وتم احمد مستانس يوم شافهم استانسو وتم كل شوي يقول ماما
    وعقب حملت ميثا ويابت بنت وسموها عليا ووالكل استانس على عليا اليديده
    .
    .
    .
    النهــــ~~ لاخويــ ولا مخاويــ ولا لقيتــ اليــ اهتويتــ ~ ~ـــايه
    avatar
    شــــــ الوردــلال

    عدد المساهمات : 18
    نقاط : 17634
    تاريخ التسجيل : 16/12/2010

    رد: ~..يوميات عليا...~الجزءالسادس عشر

    مُساهمة من طرف شــــــ الوردــلال في الثلاثاء ديسمبر 28, 2010 7:53 am

    يسلمــــــــوو
    avatar
    ★..RORO..★
    عضو متميز
    عضو متميز

    الاوسمة
    عدد المساهمات : 252
    نقاط : 18264
    تاريخ التسجيل : 09/12/2010
    العمر : 24
    الموقع : JusT riGht hEaR

    رد: ~..يوميات عليا...~الجزءالسادس عشر

    مُساهمة من طرف ★..RORO..★ في الجمعة يناير 07, 2011 1:55 am

    يسلمك الله يا امر
    avatar
    Funkat
    الإدارة
    الإدارة

    الاوسمة
    عدد المساهمات : 745
    نقاط : 19113
    تاريخ التسجيل : 18/03/2011
    العمر : 20
    الموقع : ديآآآر قــآآبوس ..

    رد: ~..يوميات عليا...~الجزءالسادس عشر

    مُساهمة من طرف Funkat في الإثنين مايو 30, 2011 11:59 am


    بنت المنصورة

    عدد المساهمات : 38
    نقاط : 16497
    تاريخ التسجيل : 03/07/2011
    العمر : 21
    الموقع : فى مصر

    رد: ~..يوميات عليا...~الجزءالسادس عشر

    مُساهمة من طرف بنت المنصورة في الأحد يوليو 10, 2011 7:35 am

    والله

    انى بكيت الان وانا اكتب الرد ده

    ياه ماتت ما توقعت هذا وكان الحكاية ستعود تانى





    ويحصل نفس اللى حصل لعليا

    شكراااااااااااااااااااااااااااااااااااااااااااااااااا
    جميلة جدا والله
    avatar
    ★..RORO..★
    عضو متميز
    عضو متميز

    الاوسمة
    عدد المساهمات : 252
    نقاط : 18264
    تاريخ التسجيل : 09/12/2010
    العمر : 24
    الموقع : JusT riGht hEaR

    رد: ~..يوميات عليا...~الجزءالسادس عشر

    مُساهمة من طرف ★..RORO..★ في الإثنين أغسطس 01, 2011 4:55 pm

    القمر المرح:امون شكر ع المرور الطيب

    بنت المنصورة:اييييييه العفو ولو انا اصلها عجبتني وايد عشان جي حطيتها تنبسطوا معي..صح والله صدقتي انا بعد بكيت والله رحمتها
    لكن معليش عليا بنت ميثاء بتخلد الاسم..شككككرا ع المرور وشكرا لانج تابعتيها وقريتيها ..
    avatar
    ¨°o.O (عاشقةHالجنة) O.o°"
    عضو ذهبي
    عضو ذهبي

    عدد المساهمات : 811
    نقاط : 17414
    تاريخ التسجيل : 02/08/2011
    العمر : 22
    الموقع : عدال بيت جيراننا

    رد: ~..يوميات عليا...~الجزءالسادس عشر

    مُساهمة من طرف ¨°o.O (عاشقةHالجنة) O.o°" في الأربعاء فبراير 29, 2012 4:28 am

    القصة
    مررررررة حلوة
    بس النهاية حزينة
    مشكووورة

      الوقت/التاريخ الآن هو الثلاثاء ديسمبر 18, 2018 9:47 am